பொங்கல் பொங்கி மகிழ்வோமே!

மகாதேவ ஐயர் ஜெயராமசர்மா
மேனாள் தமிழ்மொழிக் கல்வி இயக்குநர்
மெல்பேண் …. ஆஸ்திரேலியா

தை பிறக்கப் போகுதடி தங்கமே தங்கம்
தளர் வகலப் போகுதடி தங்கமே தங்கம்
கை நிறையப் போகுதடி தங்கமே தங்கம்
கை யணைத்து நிற்போமே தங்கமே தங்கம்

பொங்கல் வரப்போகுதடி தங்கமே தங்கம்
புத்துணர்வு பெற்றிடுவோம் தங்கமே தங்கம்
மங்கலங்கள் வரவெண்ணி தங்கமே தங்கம்
பொங்கலிட்டு மகிழ்வோமே தங்கமே தங்கம்

உறவுகளைக் கூட்டிடுவோம் தங்கமே தங்கம்
உவகையுடன் பொங்கிடுவோம் தங்கமே தங்கம்
அறவுணர்வை அகமிருத்தி தங்கமே தங்கம்
அனைவருமே பொங்கிடுவோம் தங்கமே தங்கம்

புதுப்பானை எடுத்திடுவோம் தங்கமே தங்கம்
புத்தரிசி வாங்கிடுவோம் தங்கமே தங்கம்
அடுப்பெடுத்து வைத்திடுவோம் தங்கமே தங்கம்
அதில்பானை ஏற்றிடுவோம் தங்கமே தங்கம்

மங்கலமாய் கோலமிட்டு தங்கமே தங்கம்
மண்பானை அலங்கரித்து தங்கமே தங்கம்
பாலூற்றி பக்குவமாய் தங்கமே தங்கம்
பால்பொங்க பார்ப்போமே தங்கமே தங்கம்

பொங்கிவரும் வேளையிலே தங்கமே தங்கம்
போட்டிடுவோம் புத்தரிசி தங்கமே தங்கம்
வெந்துவரும் வேளையிலே தங்கமே தங்கம்
வெல்லத்தைப் போட்டிடுவோம் தங்கமே தங்கம்

குடும்பமாய் சூழ்ந்தபடி தங்கமே தங்கம்
குதூகலத்தில் மிதப்போமே தங்கமே தங்கம்
பொங்கல்தரும் வாசனையோ தங்கமே தங்கம்
பூரிப்பை வழங்குமடி தங்கமே தங்கம்

வாசலிலே கோலமிட்டு தங்கமே தங்கம்
மங்கலமாய் விளக்கேற்றி தங்கமே தங்கம்
ஆதவனைப் பார்த்தபடி தங்கமே தங்கம்
அவர்க்குப் பொங்கல் படைப்போமே தங்கமேதங்கம்

புத்தாடை உடுத்திடுவோம் தங்கமே தங்கம்
புறப்படுவோம் கோவிலுக்கு தங்கமே தங்கம்
பெரியவரை வணங்கிடுவோம் தங்கமே தங்கம்
பெற்றவரை அணைத்திடுவோம் தங்கமே தங்கம்

பட்டாசு வெடித்திடுவோம் தங்கமே தங்கம்
மத்தாப்புக் கொழுத்திடுவோம் தங்கமே தங்கம்
பட்சணங்கள் பலகொடுப்போம் தங்கமே தங்கம்
பகிர்ந்தளித்து உண்டிடுவோம் தங்கமே தங்கம்

பட்டிமன்றம் நடத்திடுவோம் தங்கமே தங்கம்
பல்சுவைகள் வழங்கிடுவோம் தங்கமே தங்கம்
இட்டமுடன் இணைந்திடுவோம் தங்கமே தங்கம்
இறைநினைப்பை நிறைத்திடுவோம் தங்கமே தங்கம்

கஷ்டங்கள் அகலவெண்ணி தங்கமே தங்கம்
கடவுளைநாம் வேண்டிடுவோம் தங்கமே தங்கம்
கலகலப்பு நிறைகவென தங்கமே தங்கம்
கைகூப்பி இறைஞ்சிடுவோம் தங்கமே தங்கம்

அரசியலார் அறம்நடக்க தங்கமே தங்கம்
ஆண்டவனை வேண்டிடுவோம் தங்கமே தங்கம்
தர்மமது தலைநிமிர தங்கமே தங்கமே
தாழ்பணிந்து இறைஞ்சிடுவோம் தங்கமே தங்கம்

போரரக்கன் நோயரக்கன் போய் அகல
பொங்கல் திருநாளினிலே வேண்டி நிற்போம்
சாந்தியெனும் பேரொளியே எழுந்து நிற்க
சங்கற்பம் எடுத்திடுவோம் தங்கமே தங்கம்

பதிவாசிரியரைப் பற்றி

ஜெயராமசர்மா

பேராதனை பல்கலைகழக தமிழ் சிறப்புப் பட்டதாரி.அத்தோடு, கல்வியியல் துறையில் டிப்ளோமா, சமூகவியல் துறையில் டிப்ளோமா,கற்பித்தல் நுணுக்கத்தில் முதுகலை தத்துவமானி பட்டங்களையும் பெற்றவர்.கல்வித்திணைக்களத்தில் உதவிக் கல்விப் பணிப்பாளராகவும்,வட இலங்கை புனித பிரான்சிஸ் சேவியர் செமினறியில் பகுதி நேர‌ தமிழ், இந்துகலாசார விரிவுரையாளராகவும், யாழ்/ பேராதனை பல்கலைக்கழகங்களின் வெளிவாரி பட்டப்படிப்புப்பிரிவில் தமிழ் விரிவுரையாளராகவும்,இலங்கை ஒலிபரப்புக்கூட்டுத்தாபனத்தில் அறிவிப்பாளராகவும், நாடகத்தயாரிப்பாளராகவும் கடமையாற்றியுள்ளார். மாற்றம்,உதயன்,ஈழ நாடு, சிந்தாமணி, உதயசூரியன் இந்துசாதனம், மெல்லினம், உதயம்,பத்திரிகைகளில்.. கவிதை, கட்டுரை,சிறுகதை,விமர்சனம், ஆகியவற்றை எழுதியுள்ளார்.10க்கு மேற்பட்ட நூல்களையும்,100 ஓரங்க நாடகங்களையும்,10க்கு மேற்பட்ட வில்லுப்பாட்டுக்களையும்,20க்கு மேற்பட்ட நாட்டிய நாடகங்களையும், எழுதியுள்ளதோடு.. “முதற்படி” என்னும் குறுந்திரைப்படத்துக்கு கதை வசனம் எழுதி நடித்து 2007ல் அவுஸ்த்திரேலியாவில் மெல்பேண் நகரில் வெளியீடும் செய்யப்பட்டது.ஈழத்தில் பல ஸ்தலங்க‌ளுக்கு ஊஞ்ஞல் பாடியுள்ளதோடு.. அண்மையில் மேற்கு அவுஸ்த்திரேலியா பேர்த் மாநகரில் கோவில்கொண்டிருக்கும் பாலமுருகப்பெருமான் மீதும் ஊஞ்ஞல் பாடியுள்ளார்.2008ல் மதுரைமாநகரில் நடைபெற்ற அகில உலக சைவ‌ சித்தாந்த மாநாட்டில் புராணப்பகுதிக்கு தலைவராகவும், ஆய்வுக் கட்டுரையாள‌ராகவும் விளங்கியுள்ளார்.அண்மையில் ஐரோப்பிய நாடுகளுக்கு சுற்றுப்பயணம் சென்று அங்கெல்லாம்.. தமிழ்,கலாசாரம், இந்துசமயம்,சம்பந்தமாக விரிவுரைகள் ஆற்றியுள்ளார்.லண்டனில் ஜி.ரி.வி. நிலையத்தார் சமயம்,தமிழர்பண்பாடுசம்பந்தமாக இரண்டு தினங்கள் பேட்டி கண்டு நேரடியாக ஒளிபரப்புச்செய்தனர்.
தற்போது மெல்பேண் தமிழ்ச்சங்கத்தின் ஆலோசகராகவும்,விக்டோரியா இந்து கல்விமையத்தின் ஆலோசகராகவும், தமிழ் அவுஸ்த்திரேலியன் சஞ்சிகையின் இணை ஆசிரியராகவும் விளங்குகிறார்.
பூர்வீகம் தமிழ்நாடு தாராபுரம். வளர்ந்தது, படித்தது, வேலை பார்த்தது, யாவுமே இலங்கையில்..தற்போது குடியுரிமை பெற்றிருப்பது அவுஸ்த்திரேலியாவில்.

See author's posts

Tags: மகாதேவ ஐயர் ஜெயராமசர்மா