எப்படிச் சாத்தியம்?

-கனவு திறவோன்

சிரித்துப் பேசியிருக்கிறோம்
அழுது பேசியிருக்கிறோம்
கடிந்து பேசியிருக்கிறோம்
அடித்துப் பேசியிருக்கிறோம்

அணைத்துப் பேசியிருக்கிறோம்
பிணைந்து பேசியிருக்கிறோம்
ஃபோனில் பேசியிருக்கிறோம்
வாட்ஸ் அப்பில் பேசியிருக்கிறோம்

ஃபேஸ்புக்கில் பேசியிருக்கிறோம்
கண்களால் பேசியிருக்கிறோம்
பார்த்துப் பேசியிருக்கிறோம்
பார்க்காமல் பேசியிருக்கிறோம்

பார்க்கில் பேசியிருக்கிறோம்
பீச்சில் பேசியிருக்கிறோம்
ஆடிப் பேசியிருக்கிறோம்
பாடிப் பேசியிருக்கிறோம்

நடந்து பேசியிருக்கிறோம்
கடந்து பேசியிருக்கிறோம்
போகிற போக்கில் பேசியிருக்கிறோம்
மௌனமாய்ப் பேசியிருக்கிறோம்

செய்கையில் பேசியிருக்கிறோம்
ஏன்?
பேசாமலும் பேசியிருக்கிறோம்
இப்போது
“பேசாமல் போ!” என்கிறாய்
எப்படிப் போவேன்?

பதிவாசிரியரைப் பற்றி

கனவு திறவோன்

தூத்துக்குடி மாவட்டம் உடன்குடிக்கு அருகில் இருக்கும் மெய்ஞானபுரம் என்ற சிற்றூரில் பிறந்தவர் கனவு திறவோன். தனது பள்ளிப்படிப்பை மெய்ஞானபுரம் அம்புரோஸ் மேல்நிலைப்பள்ளியில் முடித்துவிட்டு, இளநிலை அறிவியல் படிப்பை நாசரேத் மர்காசிஸ் கல்லூரியிலும், முதுநிலைப் படிப்பை மதுரை காமராஜர் பல்கலைக் கழகத்துக்குட்பட்ட அமெரிக்கன் கல்லூரியிலும் மேற்கொண்டவர். வேதியியலில் ஆராய்ச்சிப் படிப்பை (Ph.D.) கான்பூர் இந்தியத் தொழில்நுட்பக் கழகத்தில் முடித்தவர். நூற்றுக்கு மேல் ஆராய்ச்சிக் கட்டுரைகள் எழுதியுள்ளார். தற்போது வேதியியல் பேராசிரியராகப் பணியாற்றி வருகிறார்.

கவிதைகள், சிறுகதைகள், கட்டுரைகள் எழுதுவதைப் பொழுதுபோக்காகச் செய்து வருபவர்.

See author's posts