வந்து விட்டது வசந்த காலம் !!!
பி. தமிழ்முகில் நீலமேகம்
இலையுதிர்த்த மரங்களெல்லாம்
மலர்களால் அலங்கரிக்கப்பட்டிருக்க
மகரந்தங்களைத் தேடி மலர்களை
சில் வண்டுகள் ரீங்கரிக்க
குறுகிய காலத்துள் –
மரக் கிளைகளில்
இலைகள் துளிர்த்திருக்க
உதிர்ந்த மலர்கள்
நிலமெங்கும் மலர் மஞ்சம்
அமைத்திருக்க –
எங்கெங்கு காணினும்
மஞ்சள் மகரந்தங்கள்
மங்களம் பரப்பிட
கூடவே ஒவ்வாமையையும்
இலவச இணைப்பாய்
அள்ளி வழங்கிட
உற்சாகமூட்டும் வண்ணங்கள்
நம்மைச் சூழ்ந்திருக்க
பறவைகள் பரவசமாய்
வானில் இசைபாடி
வலம் வர – உறக்கத்திலிருந்த
அணில்களும் முயல்களும்
உற்சாகமாய் துயிலெழுந்து
துள்ளியோட – வந்து விட்டது
வசந்த காலம் !!! – எங்கெங்கும்
உற்சாகமும் இன்பமும்
சூழ்ந்திருக்கவே !!!!
