Tag: மெய்யன் நடராஜ்

மெய்யன் நடராஜ்

 

ஏழை எளியோர் வாழ்வின்

இன்னல் களையும் தொண்டு

மனப்பான்மையை காதல் செய்தார்

நோபல் வென்றார் அன்னை தெரேசா..

 

அடிமை விலங்குடைத்து

விடுதலை சிறகசைக்க

அஹிம்சையை காதல் செய்தார்

சுதந்திரம் தந்தார் அண்ணல் காந்தி.

 

அறிவியல் கண்கொண்டு

நாளைய நோக்கிய இன்றில்

ஆராய்ச்சிகளைக்  காதல் செய்தார்

விஞ்ஞான ஜனாதிபதி அப்துல் கலாம்

 

புரட்சிக் குரலெடுத்து

பெண் விடுதலைக்காய் கூவியே

தமிழைக் காதல் செய்தான்

கவிஞனாய் மகாகவி பாரதி.

 

ஆதலால் காதல் செய்வீர்.

அவர்களாக இல்லாமல் போனாலும்

நமக்கான அடையாளமாய்

கொஞ்சம் மனிதாபிமானத்தையேனும் ..!

-மெய்யன் நடராஜ் 

இல்லையில்லை இங்கு மழையில்லை என்றழுத
தொல்லை தனைமாற்ற மண்மேலே – எல்லையற்றுப்
பெய்யும் மழைதந்து மக்கள் மனம்கழுவி
உய்விக்க விட்டான் இறை.

உய்விக்க விட்ட உயர்மழை நீண்டதால்
செய்வ தறியாது திண்டாடி – மெய்யுருகித்
தெய்வமே போதும் நிறுத்தி விடுஎன்று
பெய்தலில் சோர்ந்தார் பிணித்து.

பார்க்கும் இடமெங்கும் தண்ணீர்மயம் கொட்டித்
தீர்க்கும் மழையாலே திக்கற்று – நீர்க்குள்
திசைதேடி நிற்கும் சனம்கண்டு நெஞ்சம்
அசைவற்று நிற்கு ததிர்ந்து.

அரியா சனமமர்ந்து ஆட்சி தனையே
புரியும் அதிபதி  மார்க்கும் – சரியா
சனம்கொடுத்து நீரால் சமத்துவம் காட்டச்
சினம்கொண்ட வானின் சிதைப்பு.

வீடுகள் தம்மை விரைவாக மூழ்கடித்துக்
கேடு விளைவித்துத் துன்பத்தில் – போடும்
அடைமழை  மக்கள் இயல்பு நிலையைப்
புடைத்தெடுத்து  விட்டதுவே பார்.

கையில் பணமும் கடல்போல் நிலமிருந்தும்
மெய்யுறங்க மெத்தை மிருதிருந்தும்  –  வெய்யிலைச்
செய்ய பணத்தால் வழியற்று வீதிநின்றுக்
கையேந்த வைத்ததியற் கை.

தொடர்மழை வெள்ளம் துடிதுடிக்க வைக்க
இடர்ப்படும் மக்கள்  பலவாய் – இடம்பெயர்ந்
தாங்காங்கே நிர்க்கதியாய் நின்று தவிக்கின்றார்
தூங்குவதாய் இல்லை விசும்பு.

ஊரெங்கும் நீரிரிந்து மள்ளிக் குடிப்பதற்கு
நீரின்றித் நீர்மேலே தத்தளிக்கும் – பேர்கொண்ட
போராட்டம் மாறிப் புனர்வாழ்வு காண்பதற்கு
நீரோட்டம் சற்றே நிறுத்து.

தூர இருந்து துடிக்கின்றோம் நாமிந்த
நேரத்தில் நெஞ்சம்  பதைக்கிறோம் – சீரற்றக்
காலநிலை சீக்கிரம் சீராக் கியற்கைநீ
கோலமிடு வானின் சுடர்.

உழைத்துண்போர் கேட்டுத் தவமிருந்த பொன்செய்
மழைக்காலம் விட்டுவிட்டு வன்செய் – பிழைக்காலம்
தந்தினி என்செய்வோ மென்றேங்க விட்டாயே
நொந்தனர் நூலாய் நொடிந்து.

 

 

-மெய்யன் நடராஜ்

உயிரின் கிளையில்
உட்கார்ந்திருந்த
எண்ணப்  பறவை தன்னை
உலுப்பிக்கொண்டு இறக்கைகளை
உதறியபோது அது நடந்தது

தாய்ப் பறவையைப் பிரிந்து
தன்னிச்சையாய்ப் பறக்க எத்தனிக்கும்
சேய்ப் பறவையின் முனைப்போடு
தவறுதலாய் உதிர்ந்துகொண்ட
அந்த இறகு!

வானத்தின் புது விருந்தாளியாய்
வரவேற்கப்பட்டுச் சுதந்திரமாய்
அந்தரத்தில் கட்டுப்பாடுகளற்ற
முகில்களின் குடும்ப அங்கத்தினராகி
இருப்பின்றி அலைந்தது

பசி மறந்து
பட்டினி தொலைத்து
நாளையைப் பற்றிய
கவலைகளை உதிர்த்து                               
ஜனனம் மரணம் பற்றிய
பயம் உதறிப் பிறவியின்
பயனடைந்த பயணத்தில்
சிலாகித்துக் கொண்டது
சிங்கத்தை வென்ற
சிறுநரியாய்!

நாளொன்றில் மட்டுமே
நாடெங்கும் கொடியேற்றிக்
கொண்டாட்டங்கள் என்று
கொண்டாடுவோர் கூட்டத்தினைப்
பார்ப்பதற்குக் காவலர்களால்
அனுமதி பெறப்பட்டபின்னே
அந்த வட்டத்துக்குள்
சுதந்திரமாகத் திரியக் கூடிய
எமது சுதந்திர தினத்தைப் போலன்றி
எல்லைகற்ற திசைகள் மறந்த
சுதந்திரக் காற்றைச்
சுவாசித்த சுதந்திரத்தின்
சுதந்திரமான சுதந்திரத்தின்
சுகவாசத்தின் வாசனை
முகர்ந்தபடி கூத்தாடியது
அந்த இறகு!

தெளிந்த நீரில்
முட்டையிட்டு இனவிருத்திச்
செய்கின்ற ’டெங்கு’ கொசுக்களின்
கூடாரம் தாங்கிய குடிசையோரச்
சுகாதாரக் கேடுகள் ஆராயாமல்
வாங்கும் சம்பளத்துக்குத்
துரோகம் செய்யும்
அசமந்தப் போக்குடைய
அரச அதிகாரியாகவும் இல்லாமல்

கொள்ளைக் காரர்களுக்கு
வழிவிட்டுக் கொடுத்துக்
குடும்பஸ்தர்களிடமும்
ஏழை வாகன சாரதிகளிடமும்
கைக்கூலி வாங்கிச்
சம்பளப் பணத்தைச்
சேமிப்பில் போடும்
காவல் துறையாக இல்லாமலும்

ஆட்சி  பீடத்தில்
அமர்ந்திருப்போர் புரிகின்ற
அட்டூழியங்களுக்கு
ஒத்து ஊதிக்கொண்டு
பதவியைக் காப்பாற்றிக்
கொண்டிருக்கும்
உயர் அதிகாரிகளாக இல்லாமலும்

ஊர்ப் பணத்தைக்
கொள்ளை அடித்து
வெள்ளையாக்கி வெளிநாட்டில்
சொகுசுவாழ்க்கை அமைத்துக் கொள்ளும்
ஊழல் நிறைந்த
அரசியல் வாதியாக இல்லாமலும்

சமூக அவலங்களைக்
கண்டும் காணாமல்
சகிப்பு வாழ்க்கை நடாத்தும்
சாதாரணப் பொது மக்களாய் இல்லாமலும்

ஒருவேளைச் சோற்றுக்காய்
ஊரெங்கும் சுற்றித் திரிந்து
வெளியே தெரியாமல்
பட்டினிக் கிடக்கும்
நடுத்தர வர்க்கமாய் இல்லாமலும்

கஞ்சா கடத்திக்
கள்ளச்சாராயம் காய்ச்சித்
தடை செய்யப்பட்ட போதைப் பொருட்களை
உயர்மட்ட அனுமதியோடு
அந்தரங்கமாய் விற்று
ஆதாயம் தேடலுக்காய்ச்
சமூகம் அழிக்கும்
பாதாள உலகத்தினராய் இல்லாமலும்

பொதுநலம் என்னும்
தொலைநோக்கோடு
ஆரம்பிக்கப்பட்டு முடிவில்
பணம் காய்க்கும் மரமாக
மாறிப்போகின்ற
பள்ளிக்கூடமாகவோ
மருத்துவமனையாகவோ இல்லாமலும்

பச்சிளங் குழந்தைகளையும்
உடற்பசிக்காய் உருக்குலைக்கும்
கொடுங் காமுகர்களாய் இல்லாமலும்

விஞ்ஞான வளர்ச்சி என்னும் பேரில்
அயல் வீட்டானைக்கூட மறந்து
கணினிக்குள்ளும்
கைப் பேசிக்குள்ளும்
தம்மை மறந்து மூழ்கிக் கிடக்கும்
இன்றைய இளைய
சமுதாயத்தைப்போல் அல்லாமலும்

ஒரு சமாதானத் தேவதையின்
மனதோடு கூத்தாடிக் கூத்தாடிச்
சிதைவுகளற்ற பிரபஞ்சமொன்றின்
கதவுகள் திறந்து உள்ளே சென்று
நிசப்தங்களின்  மிக நேர்த்தியான
தொழில் நுட்பத்தினால்
செய்யப்பட்ட அரியணையில்
அமர்ந்துகொண்டு
மௌனப் புரட்சியால் ஓர்
ஏகாந்த யுத்தம் செய்தது!

அந்த ஏகாந்த யுத்தத்தின் நடுவே
மலைகள் தகர்ந்து
கடலில் வீழ்ந்த பேரிரைச்சலாய்
ஒரு முரட்டு மிருகம்
குருட்டுத் தனமாய் மோத…

அமாவாசை இரவொன்றில்
கருங்குரங்கொன்றை
ஒளி பாய்ச்சாப்
புகைப்படக் கருவியினால்
படம்பிடித்த வெற்றிக் கேடயத்தை
வாங்கிக் கொண்ட சோகத்தில்
சுருண்டு வீழ்ந்தது இறகின் பயணம்!

இனி ஒருநாள்
விலங்கு போர்த்திய
மனிதம் அதை எடுத்துக்
காது  குடைந்து கழிவில் வீசலாம்!

 

 

 –மெய்யன் நடராஜ்

நாளை தமிழும் தமிழரும் இங்கோங்கும்
வேளை அதற்காக இன்றெங்கள் – தோளை
நிமிர்த்தித் தொலைதூர நோக்கோடு செய்வோம்
அமிர்த  மொழிக்கு அரண்.

பழமை மறவாப் புதுமை படைத்து
அழகும் பொலிவும் அமைய – வழங்கும்
புலமைத் தமிழைப்  புவனம் முழுதும்
உலவ விடுவோம் உவந்து.

தமிழராய் வாழும் தரம்மிகுந்த வாழ்வை
அமிலம் தெளித்தழிப்போர் முன்னால் – நிமிர்ந்தே
எதிர்நின்று எம்தமிழை ஏற்றி  விளைந்த
கதிராகச் செய்வோம்  தெளிந்து.

மூத்த மொழியாய் முகிழ்த்த மொழியென்றே
பார்த்து அறிந்து பழகிட – ஈர்த்தெடுக்கும்
எம்மொழி இன்னல் எதிர்கொண்டு நிற்பினும்
செம்மொழி யானதே சீர்.

ஓசோன் துளைவழியே ஓர்நாள் உலகத்தில்
வீசும் வழியற்றுப் போனாலும் – பேசும்
மொழியாய்த்  தமிழ்வாழ முன்னெடுத்துச் செல்லும்
வழியமைத்தால் வாழும் தமிழ்.

 

-மெய்யன் நடராஜ் 

நவீனத்துவத்தின் பொற்காலம்
தொடங்கிவிட்டது
வரைந்தவன் கைகளுக்கு
மோதிரம் அணிவிக்கணும் என்று
ஓவியன் வியந்திருக்கிறான்!

சாஸ்திரிய சங்கீதத்தையும்
மேற்கத்தைய சங்கீதத்தையும்
கலவை செய்த இசைக்குறிப்பு
இந்த நூற்றாண்டின்
மாபெரும் புதுமை
ஒஸ்கார் விருதுக்குப்
பரிந்துரை செய்யவேண்டும்
அபாரம் அபாரம்
பாராட்டித் தள்ளியிருக்கிறார்
பாகவதர்!

குணப்படுத்த முடியாத
நோய் ஒன்றுக்கான
வைத்தியரின் மருந்து சீட்டு
விலை அதிகமென்று
மயக்கம்போட வைத்திருக்கிறான்
மருந்துக்கடைக்காரன்!

மேல்நாட்டுப் பாணியிலான
நவீனக் கட்டடமொன்றிற்கான
வரைபடக் கூறு என்று
வரையறுத்துக் கூறிவிட்டான்
பொறியியலாளன் ஒருவன்!

பயங்கரக் கொலை கொள்ளையோடு
சம்பந்தப்பட்ட குற்றவாளியின்
கைரேகை அடையாளமென்று
திட்டவட்டமாகக் கூறி இருக்கிறான்
உளவுத்துறை நண்பனொருவன்!

சட்டைப் பையில் இருந்த
காகிதக் குறிப்பைப் பாராமல்
சலவை செய்துவிட்டு
இஸ்திரி கைபோடும்போது
அவதானித்துப் பதறிப்போனவள்
தெரிந்தவர்களிடம் கேட்டுக் குழம்பியதை
மாலையில் வீட்டுக்குவந்த
என்னிடம் காட்டினாள்

பார்த்துவிட்டுக் கேட்டேன்
“உனக்கு ஏதும் விளங்குகிறதா?”
“இல்லை” என்றவளிடம்
எனக்கும் விளங்கவில்லை
ஊரிலுள்ள எவருக்கும் விளங்கவில்லை
என்றால் நிச்சயம் இது
கையெழுத்து அழகில்லாதவன்
யாராவது எழுதிய ’புதுக்கவிதை’தான்
அடித்துச் சொன்னேன் நான்!

வாங்கிப் பார்த்துவிட்டு
“ஐயோ அப்பா” இது நேத்து
பேனா வாங்கும்போது
எழுதுதான்னு
கிறுக்கிப் பார்த்த காகிதம்
என்று  மகன் எடுத்து வீசும்மட்டும்
புரியவேயில்லை…
விளங்காத என்
கிறுக்கிப் பார்த்த காகிதம்!

 

-மெய்யன் நடராஜ்

முக்கனியின் இரண்டாங்கனி முகமெடுத்த போதிலுமே
–முள்போன்று குத்தாத முகமலர்ச்சி கொண்டிருந்தே
அக்கனியின் உள்ளிருக்கும் அமுதச்சுளை போலிருக்கும்
–அகம்படைத்த குலமகளாய் அன்புஎனும் மேகத்தினால்
சர்க்கரைபோல் இனிக்குமொரு சாரல்மழை பொழிந்திட்டால்
–சாக்கடைபோல் கிடப்பவனும் சந்தனமாய் உருமாறும்
அக்கறையும் கொண்டெழுந்து அடியெடுத்துக் கால்நடக்க
–அமைகின்ற தாரமவன் அரண்மனைக்கு அஸ்திவாரம்!

இல்லையெனும் பாடலினை எந்நாளும் பாடாமல்
–இருப்பதனை கொண்டவளும் பொறுப்புடனே நடந்திட்டால்
தொல்லைதரும் வாழ்வினிலே தொடர்கதையாய் வருகின்ற
–துன்பங்கள் துயரங்கள் தூரத்தில் போய்மறையும்
எல்லையில்லா ஆனந்தம் இல்லறத்தில் பூப்பூக்கும்
–எதிர்கால நிறைவுக்கு எதிர்பார்ப்பை குறைத்தேதான்
நல்லவழி காட்டுகின்ற நாயகியாய்த் திகழ்ந்தென்றும்
–நாயகனுக் கொத்தாசை புரிவதுவே நல்லொழுக்கம்!

 தாய்வீட்டுப் புராணங்கள் தலைக்கேற்றி எந்நாளும்
–தற்பெருமை பேசுகின்ற தப்பிதங்கள் என்கின்றப்
பேய்விட்டு ஓடுதற்கு பெரும்பாலும் பாடுபட்டுப்
–பேசுகின்ற வார்த்தைகளில் பேதைமைகள் என்கின்ற
நோய்தொற்று வாராமல் நுணுக்கமாகக் காப்பாற்றி
–நூறாண்டு இல்வாழ்க்கை நூதனமாய் நிலைத்திருக்க
காய்க்கின்ற மரமாகிக் கல்லடிகள் தனைதாங்கிக்
–கனிந்துவிடும் போதினிலே காதல்கனிச் சுவையாகும்!

பிள்ளைகளைப் பெற்றெடுக்கும் பிறவிகளாய் மட்டுமன்றி
–பெண்குலத்தின் பெருமைக்குப் புகழ்சேர்க்கும் வகையினிலும்
உள்ளதெல்லாம் வாரிவாரி இறைக்காமல் கொஞ்சத்தை
–ஊருக்கும் பகிர்ந்தளிக்கும் உயர்குணத்தில் சிறந்தவளாய்க்
கள்ளமில்லா மனத்துடனே கணவனவன் வியர்வைத்துளி
–கரையாமல் காப்பாற்றிக் கரையேறும் போதினிலே
வெள்ளிநிலா விடியும்வரை வாசலிலே காத்திருந்து
–விடிவெள்ளி உன்வெளிச்ச விலாசத்தைக் கடன்கேட்கும்!

 

-மெய்யன் நடராஜ்

வாசற்படியில்லாமல்
கட்டிய வீட்டுக்கு
வேயப்படாத கூரை

விருந்தாளிகளாய் வருவோர்                 
விருந்தாகும் வினோத வீடு                            

பூச்சிகளின் 
அந்தர மயானம்

சிக்கலான வீட்டுக்குள்
சிறப்பாக வாழ்வது பற்றிக்
கற்றுக் கொள்ள
கட்டப்பட்ட பள்ளிக்கூடம்

சிக்கலுக்குள் வாழ்ந்தாலும்
சிக்கிக் கொள்வதுகளிடத்தில்
சிக்கிக் கொள்ளாமல் வாழ்வதன்
சிறந்த எடுத்துக் காட்டு

சிக்கல் இல்லாமல் போனால்
வாழ்தலில் சுவாரஸ்யம் இல்லை
என்பதையும் உணர்த்தும் சிந்தனை

கூரையில்லா வீட்டுக்குள்
குறைவில்லாக் குடும்பம்
நடத்துவதற்கான குறும்படம்

அரண்மனை வாசலில்
துப்பாக்கியோடு
நிற்கும் காவலனை ஏமாற்றிவிட்டு
அனுமதியில்லாமல்
கொத்தனாரில்லாமல் அரண்மனைக்குள்ளும்
கட்டப்பட்டு விடுகிற இந்த வீடு
அசந்தால் காவலனின்
துப்பாக்கிக்குள்ளும் கட்டப்பட்டுவிடும்  

விளக்கைப் பிடித்துக் கொண்டு
கிணற்றில் விழுவதாய் வீழும்
மின்மினிப் பூச்சிகளிடம்
வெளிச்சத்தையோ…
நிறங்களில் கவர்ச்சியூட்டி
மயக்குவதாக நினைத்து வந்து
மாட்டிக்கொள்கின்ற
வண்ணத்துப் பூச்சிகளிடம்
அழகையோ வாங்கிக்
கொள்ளாவிட்டாலும்
அழகாய் வெளிச்சமாய் வாழும்
சிலந்திகள் தன்னம்பிக்கையின் வேர்கள் !

 

மெய்யன் நடராஜ்

 

மழைக்காலத்துக்கான மேகங்கள்
உதிர்கின்ற இலைகளில் இருந்துதான்
சேமிக்கின்றன
வானவில்லுக்கான நிறங்கள்!

இதழ்கள் பரப்பி பூப்பதில்
காம்புகளின் வெற்றிடங்கள் நிரப்பும்
மலர்களை அந்நியப்படுத்திவிட்டு
இலைகள் பரப்பி நிறங்களை
புஷ்பிக்கும் இலையுதிர்கால
வர்ணங்களில் வசப்படுகிறது
மரணத்தின் அழகு

மர வீடுகளின்
கூரைகளுக்கு வேயப்படும்
பச்சை ஓடுகள் இலைகள்

தூக்கி வளர்த்தக் கிளைகள்
துரத்திவிடும் பட்சத்தில்
பாதத்தில் சரணடையும்
பழுத்த இலைகள்
வேர்களுக்கு விருந்து
கொடுக்கின்றன உரமாய்.

தாமரை இலைகளின்மேல
தண்ணீராய் ஒட்டாமல்
தாவர வளர்ப்பின் மேல்
ஒட்டாமை வளர்க்கின்ற
பிரபஞ்சத்துக்கு
வரும்பஞ்சத்தை
பாடமாக்கிப் போதிக்கின்றன
இலைகள் .

இலைகள் இயற்கை வைத்தியர்கள்.

தூதுவளை ,துளசி
கொத்தமல்லி புதினா
வல்லாரை முருங்கை என்று
நீள்கின்ற மூலிகை இலைகள்
இயற்கை வைத்திய மாளிகை

புழுக்கள் கூடுகட்ட
தன்னையே கொடுக்கும்
ஈகைக் குணத்தில்
வள்ளல்களை மிஞ்சிவிடுகின்றன

விலங்குகள் கேட்டாலும்
மனிதன் கேட்டாலும்
இலைகள் இல்லை என்று
கைவிரிப்பதில்லை .

சருகாகி உதிர்ந்தாலும்
மக்கி உரமாகும் வரமாகும்
இலைகள் ஒருநாளும்
கைவிரிப்பதில்லை.

வாழை இலைபோட்டு
வயிறார உண்ணும்போது
எடுத்தெறியும்
கரிவேப்பிலையைபோல்
எடுத்து வீசி விடுகிறோம்
இலைகளின் மகிமைகளை

சுபகாரியங்களில்
முதலிடம் கொடுத்து வரவேற்று
பின் அதையே மென்றுத் துப்பி
பொது இடங்களை அசுத்தமாக்கி
கெட்ட பேர் வாங்கிக் கொடுக்கிறோம்
வெற்றிலைகளுக்கு

மொட்டைமரங்களின்
ஓட்டை நிழல்களில்
உட்கார்ந்து பேச
யாருமில்லா ஊர் வாய்
இலைகளை பற்றிப்
பேசத்தவருவதில்லை

இலைகள் இருப்பதால்தான்
இளைப்பாருகிறோம்.
இறந்தாலும் பாடையாய்ச் சுமக்கும்
இலைகளைப் பார்த்து
மண்மேல் வந்தது வாழ்ந்தது
மண்ணுக்குச் சொந்தம் என்பதை
மனதுக்குள் வைப்போம்.

-மெய்யன் நடராஜ்

விளக்கமாக விளக்கிச் சொல்லியும்
விளங்காத நிலையில்
விளங்குச்சா என்னும்
வாத்தியாரின் அதட்டலில்
விளங்காததையும்
விளங்கியதாய் தலையசைக்கும்
விடலைநாட்களின் தொடர்ச்சி
விடவே இல்லை இன்னும்….

விளங்கிப் படிச்சவங்க எல்லாம்
விலங்கியலும் பௌதீகமும் என
விரிவாகப் படிக்கப் போனபோது
விளங்காம படிச்ச எனக்கும்
விளங்கிப் படிச்சிருந்தா கொஞ்சம்
விளக்கமாப் படிக்கலாமுன்னு
விளங்கியது,
விளங்க வேண்டிய நேரத்தில்
விளங்கிக்காம இருந்துட்டு
விளங்காததை இப்போ
விளக்கமாக விளக்குமாறு
விளங்கியவர்களிடம் கேட்க, எடு
விளக்கமாத்த என்பதில்
விரிகிறது விசனத்தின் விசும்பு.

விளக்குமாறு பற்றி
விளக்குமாறு கேட்டால்
விளக்குமாறே விளக்கும்

விளக்கு மாதிரி இருந்தும்
வெளிச்சம் தர மறுக்கும்
விளக்கமானோர் எல்லாம்
விளங்கியும் விளங்காமல் நடிக்கும்
விவஸ்தைஇல்லா அவஸ்தைகளில் நின்று
விடுதலைக்காய் போராடுவதிலும்
விளங்காமல் இருப்பதே மேலென்று
விளங்குவதில் விளங்குகிறது
விளங்காம படிக்காததின் விளக்கம்

விளக்கமாக படித்ததின்
விலைகளில் நிர்ணயமாகின்ற
விளக்கங்கள் இருதயம் மூடும்
விசித்திரங்களில் விளையாடும்
விளையாட்டு மைதானத்தில்
விளையாடப்படும் பந்தாய்
விளையாட்டுக்கும் விளையாடாமல்
விளைவிக்கப்படும் சந்தோசங்களில்
விளையாடுகிறது
விலைகொடுத்தும் கிடைக்கா வான
வில்லின் அழகுகள்

விளங்கியதை விளங்காததாய் நோக்கும்
விலங்கு மனசு வேண்டுவதற்கு
விளக்கமாகும் விளக்கங்களுக்கு
விலைகொடுக்கும் கொலைகளிலும்,
விளங்காமலிருக்கும் கலைகளில்தான்
வீணை வாசிக்கிறாள் என் சரஸ்வதி
என்பதால்தான்
வைத்தியமும் உபாத்தியாயமும்
பொறியியலும் வணிகமும் என்ற
பணம்பிடுங்கும் பிழைப்புகளிலும் நுழைந்து
கவிதையாகி நிற்கிறது என் விளங்காமை!

 

-மெய்யன் நடராஜ்

இயற்கையின் விழியிலே இறைவனும் பார்க்கிறான் 
மலர்களின் இதழ்களால் அவனுமே சிரிக்கிறான் 
பறவைகள் மொழியிலே பாடலும் இயற்றுவான் 
அருவியின் இசையிலே அழகுடன் பாடுவான்! 

மலைகளின் உயரமாய் மனதினைக் கொண்டவன் 
பசுமையின் வடிவிலே மனந்தனை ஈர்க்கிறான் 
முகில்களின் உருவத்தில் கருணையைப் பொழிகிறான் 
வனங்களின் மரங்களாய் வசீகரம் கொள்கிறான்! 

பயிர்களின் விளைச்சலால் பசியினைப் போக்குவான் 
இருளினைக் காட்டியே ஒளியினை ஊட்டுவான் 
கடல்தனில் அலைகளாய் மிதந்துமே திரிகிறான்
காற்றினில் ஒலியெனக் கலந்துதான் இருக்கிறான்!

வானத்தில் சுடரென வளமுடன் வருகிறான் 
வையகம் செழித்திட வளம்பல தருகிறான் 
ஞாலத்தை ஒருவனாய் ஆட்சியும் செய்கிறான் 
நாளைக்கு என்பதை நேற்றிலே காண்கிறான்! 

இனிமையைக் கொடுப்பதில் தேனென இனிக்கிறான் 
கொடுமையை விலங்குகள் குணத்திலே விதைக்கிறான் 
தனிமையில் இருந்திடத் துணையென வருகிறான் 
கனிகளின் நடுவிலே சுவையெனக் கிடக்கிறான்! 

இரவிலே நிலவென எழில்மழை பொழிகிறான் 
உறவிலே உயிர்களின் உயர்குணம் வளர்க்கிறான் 
பிரிவிலே நரகமாய் உழன்றுமே கொல்கிறான் 
தீயிலே ஜோதியாய்த் திகழ்ந்தவன் வாழ்கிறான்! 

தனித்தனி படைப்பதன் தனித்துவம் காட்டுவான் 
தனக்கொரு இடமின்றித் தாண்டவம் ஆடுவான் 
மணிக்குள்ளே நிமிடமாய் மறைந்தவன் கிடக்கிறான் 
மனிதனைத் திருத்திட மறுத்தவன் திரிகிறான்! 

 

-மெய்யன் நடராஜ்

நடந்தது மீண்டும் நடக்காது என்று
நடக்காதே! வாழ்வில் நடக்கும் – நடப்பை
நடத்தும் நடத்துநர் நாடகத்தில் நம்மை
நடத்துவ தொன்றே நடப்பு.

பணம்வந்து நல்ல பதவியும் வாய்த்து
மனம்மாறா நட்பை மலரின் – மணமாய்
தினந்தோறு முந்தன் திசைவீசச் செய்யுங்
குணங்கொள்ளும் நண்பன் கொடை.

சீர்திருத்த வாதியென்னும் செல்லப் பெயரெடுக்கப்
போர்தொடுத்தே தெய்வப் புகழ்மறுக்கும் – பேர்களுக்கு
ஊழ்வினை தீர்க்கும் ஒருநாள் உளம்வருந்தும்
வாழ்வளித்தோன் தன்னை நினைந்து.

மரணத்தின் வாசலிலே மண்டியிட்டு நின்றுக்
கரணந்தான் போட்டாலும் காலன் – வரவில்
சரணடையுந் தன்மை சகலருக்கு மொன்றே
அரசியல் அங்கில்லை ஆம்.

நெற்கிளி ஓட்டும் நிலமுழுவோன் கைகளிலே
பொற்கிழி நீட்டாப் புவியரசு – வெட்டுக்
கிளிகள் விரும்பும் விருது விருந்தை
அளிப்பதி லில்லை அறம்.

 

-மெய்யன் நடராஜ், இலங்கை

வாலிபத்தைத் தின்று தீர்த்து 
வயோதிகத்தின் நுழைவாயிலில் நின்று 
வரவேற்புச் செய்கிறது தனிமை! 

ஞாபகச் சிறகசைத்து 
அண்டங்கள் தாண்டிப் 
பறக்கத்தொடங்கி விட்டது அது! 

நிழலின் கரம் பிடித்து 
நெடுந்தூரம் போன பின்னும் 
இளைப்பாற இடம்தேடி 
ஏக்கத்தில் தவிக்கத் தொடங்கியும் விட்டது! 

துயரங்களின் சுரம் பிரித்துத் 
துக்கங்களால் இசை அமைத்துத் 
தோல்வியின் பாடல்களும் 
பாடிக் கொள்கிறது! 

இதயத்தைச் சுட்டெரிக்கும் 
வாழ்வின் அவஸ்தைகளோடு 
விடைகள் இல்லாத கேள்விகளின் 
பாரம் சுமந்து 
புன்னகை தொலைத்து 
நாளையைப் பற்றிய போராட்டங்களோடு 
புறப்பட்டுப் போகிறது! 

மௌனத்தின் புலம்பல்களோடு 
மயானத்தை தழுவத் துடித்து 
ஊமையாய் ஊர்வலம் போகிறது ஒரு 
ஊதாரித் தனிமை!